फोटो सौजन्य- चॅट जीटीपी
| सांगली समाचार वृत्त |
सांगली - दि. ४ फेब्रुवारी २०२५
सांगली जिल्ह्यात अमली पदार्थविरोधी मोहिमेचा एक भाग म्हणून पालकमंत्री चंद्रकांत पाटील यांच्या नेतृत्वाखाली 'टास्क फोर्स'ची स्थापना करण्यात आली आहे. या विशेष पथकाच्या माध्यमातून जिल्ह्यातील औद्योगिक वसाहतीतील १३४ बंद कारखान्यांची झाडाझडती घेतली जाणार आहे. या मोहिमेचा उद्देश बंद कारखान्यांचा अवैध कारवायांसाठी वापर होतो का, याचा शोध घेणे आहे.
संशयास्पद कारखाने !
सांगली एमआयडीसी परिसरातील काही बंद कारखान्यांमध्ये अमली पदार्थ निर्मिती व तस्करी होत असल्याचे आढळले आहे. यामुळे जिल्ह्यातील सर्व १३४ बंद कारखान्यांची तपासणी करण्याची जबाबदारी 'टास्क फोर्स'वर सोपवण्यात आली आहे. या पथकात पोलिस, जिल्हा प्रशासन, अन्न व औषध विभाग तसेच एमआयडीसी अधिकारी सहभागी आहेत.
पोलिस अधीक्षक संदीप घुगे यांनी सांगितले की, "बंद कारखान्यांचा गैरवापर होऊ नये यासाठी कठोर कारवाई केली जाईल. संशयास्पद ठिकाणी छापे मारले जातील आणि अवैध व्यवसाय करणाऱ्यांवर कायदेशीर कारवाई केली जाईल."
'नशामुक्त'साठी नागरिकांचा पुढाकार आवश्यक !
पोलिस प्रशासनाने जिल्ह्यातील नागरिकांना देखील नशेविरोधी मोहिमेत सहकार्य करण्याचे आवाहन केले आहे. अमली पदार्थ विक्री अथवा सेवन करणाऱ्यांची माहिती पोलिसांना देण्यास सांगण्यात आले आहे. या माहिती देणाऱ्यांची ओळख गोपनीय ठेवली जाईल, असे आश्वासन पोलिसांनी दिले आहे.
शाळांमध्ये सुरक्षा आणि विद्यार्थ्यांवर विशेष लक्ष !
शहरातील काही शाळकरी मुले कोयता व चाकू घेऊन दहशत माजवत असल्याच्या तक्रारी आल्यानंतर पोलिसांनी शाळांवर विशेष लक्ष ठेवण्याचा निर्णय घेतला आहे. याअंतर्गत, शाळा व महाविद्यालयांनी विद्यार्थ्यांची दप्तर तपासणी करावी, तसेच ओळखपत्र आणि गणवेश सक्तीचे करावेत, अशी सूचना देण्यात आली आहे.पोलिस निरीक्षक शाळा व महाविद्यालयांना भेट देऊन प्रबोधन करत आहेत. तसेच, जर कुणी संशयास्पद हालचाली करत असेल तर त्वरित पोलिसांना कळवावे, अशी विनंती करण्यात आली आहे.
अमली पदार्थ विरोधी मोहिमेला वेग !
सांगली पोलिस प्रशासनाने बंद कारखान्यांची तपासणी आणि शाळांवरील देखरेख या दोन मोठ्या मोहिमा हाती घेतल्या असून, जिल्ह्याला नशामुक्त करण्यासाठी कठोर पावले उचलली जात आहेत. नागरिकांनी पोलिसांना सहकार्य केल्यास हा उपक्रम अधिक यशस्वी ठरेल.
