| सांगली समाचार वृत्त |
बीड - दि. ३० जानेवारी २०२५
महाराष्ट्राचे उपमुख्यमंत्री अजित पवार आज बीड जिल्ह्याच्या दौऱ्यावर असून, जिल्हा नियोजन समितीच्या पहिल्या बैठकीला त्यांनी हजेरी लावली. या बैठकीत पालकमंत्री धनंजय मुंडे, मंत्री पंकजा मुंडे, आमदार सुरेश धस, आमदार संदीप क्षीरसागर आणि खासदार बजरंग सोनवणे यांच्यासह अनेक नेते उपस्थित होते. मात्र, या चर्चेच्या दरम्यान एक अनपेक्षित प्रसंग घडला – आमदार सुरेश धस यांनी थेट अजित पवारांकडे एक पेन ड्राइव्ह सुपूर्द करताच संपूर्ण सभागृह स्तब्ध झाले. माहिती सूत्रांच्या माहितीनुसार, हा पेन ड्राइव्ह 73 कोटी रुपयांच्या निधीशी संबंधित असून, त्याचा थेट संबंध माजी सामाजिक न्याय मंत्री धनंजय मुंडे यांच्याशी असल्याचे बोलले जात आहे.
पेन ड्राइव्हमध्ये नक्की काय?
बैठकीच्या आधीच आमदार सुरेश धस यांनी आक्रमक भूमिका घेत, धनंजय मुंडे यांच्या कार्यकाळातील संशयास्पद प्रकरणे माध्यमांसमोर मांडली होती. त्यांचा आरोप होता की, जिल्हा नियोजन समितीच्या माध्यमातून काही बोगस कामे दाखवून मोठ्या प्रमाणात निधीची अफरातफर झाली आहे. याच पार्श्वभूमीवर त्यांनी या घोटाळ्याचे पुरावे असलेला पेन ड्राइव्ह थेट अजित पवारांच्या हातात सोपवला.
अजित पवारांचा ठाम आवाज आणि सभागृहातील शांतता
सुरेश धस यांनी पेन ड्राइव्ह दिल्यानंतर सभागृहात अचानक कुजबुज सुरू झाली. काही वेळातच अजित पवारांनी आपला ठाम आवाज उठवत भूमिका स्पष्ट केली आणि संपूर्ण वातावरण गंभीर बनले. बैठकीला उपस्थित असलेल्या अनेक सदस्यांनी त्यानंतर शांतता पाळली, तर काही जणांनी या प्रकरणाबाबत चर्चा करण्यास टाळाटाळ केली. अजित पवारांनी हा पेन ड्राइव्ह ताब्यात घेतला असून, या प्रकरणावर पुढील कारवाईची शक्यता वर्तवली जात आहे.
आता पुढे काय?
धस यांनी उपस्थित केलेल्या गंभीर आरोपांमुळे जिल्हा नियोजन समितीच्या कामकाजावर अनेक प्रश्न उपस्थित झाले आहेत. हा पेन ड्राइव्ह नक्की कोणते पुरावे समोर आणतो, याकडे आता संपूर्ण राजकीय वर्तुळाचे लक्ष लागले आहे. अजित पवार या प्रकरणाची सखोल चौकशी करतील का, याबाबत लवकरच स्पष्टता येईल.
