| सांगली समाचार वृत्त |
नवी दिल्ली - दि. ४ ऑगस्ट २०२४
गेल्या एक वर्षापासून जम्मू-काश्मीरमध्ये सातत्याने होत असलेली दहशतवाद्यांची घुसखोरी या प्रमुख कारणावरून डी.जी.बी.एस.एफ. आणि स्पेशल डीजी बीएसएफ यांना हटवण्यात आले आहे. बीएसएफचे महासंचालक नितीन अग्रवाल यांच्यावर गृह मंत्रालयाने मोठी कारवाई केली आहे. नितीन अग्रवाल यांना पदावरून हटवण्यात आले आहे. त्याचवेळी बीएसएफचे विशेष डीजी वायबी खुरानिया यांनाही हटवून ओडिशा कॅडरमध्ये परत पाठवण्यात आले आहे.
जम्मू-काश्मीरमधील दहशतवाद्यांच्या घुसखोरीबाबत भारत सरकारची ही सर्वात मोठी प्रशासकीय कारवाई आहे. ज्याचा ठपका सर्वात वरिष्ठ अधिकाऱ्यांवर पडला आहे. याशिवाय पंजाब सेक्टरमधून सातत्याने होणाऱ्या दहशतवाद्यांच्या घुसखोरीवर प्रभावीपणे नियंत्रण मिळवण्यात असमर्थता हेही या कारवाईचे प्रमुख कारण मानले जात आहे.
कोणत्याही निमलष्करी दलाचे नेतृत्व करणाऱ्या दोन वरिष्ठ अधिकाऱ्यांना अशा प्रकारे हटवण्याची गेल्या अनेक वर्षांतील ही पहिलीच वेळ आहे. मिळालेल्या माहितीनुसार, लवकरच नवीन अधिकाऱ्यांची नियुक्ती करण्यात येणार आहे.
डीजी बीएसएफ नितीन अग्रवाल हे 1989 च्या बॅचचे केरळ केडरचे अधिकारी आहे, तर खुरानिया हे 1990 बॅचचे ओडिशा कॅडरचे अधिकारी आहेत. अग्रवाल यांनी गेल्या वर्षी जूनमध्ये सीमा सुरक्षा दलाचे प्रमुख म्हणून पदभार स्वीकारला होता. त्याच वेळी, खुरानिया हे विशेष महासंचालक (पश्चिम) म्हणून पाकिस्तान सीमेवर सैन्याच्या निर्मितीचे नेतृत्व करत होते.
