तुम्ही कोणत्याही भाषेत बोला समोरच्या व्यक्तीला ऐकू येईल त्याच्या भाषेत, इंदूरच्या तरुणाने बनवलं अनोखं ॲप !

| सांगली समाचार वृत्त |

इंदूर - दि. ३१ मे २०२४

माणसाला भाषेविषयीचे कुतूहल प्राचीन काळापासून वाटत आले आहे. कारण भाषा हे आपल्या अंतरंगातील मनोगत,भावना, विचार इत्यादी प्रगट करण्याचे अत्यंत प्रभावी साधन आहे. पण, बदलत्या काळानुसार भाषेत बदल होत गेल्याचे आपणास दिसून येते. वेगवेगळ्या जाती धर्माची भाषा वेगवेगळी असू शकते. त्यामुळे भाषा हा नेहमीच गुंतागुंतीचा विषय राहिला आहे. विशेषत: जेव्हा ती दुसऱ्याची भाषा असते.

विशेषतः सामान्य संभाषणात किंवा व्यवसायाशी निगडित वाटाघाटीत भाषा न समजल्याने अनेकदा मोठी समस्या निर्माण होते. याशिवाय भाषेअभावी रोजगार, नोकरीच्या अनेक संधीही हातातून सुटून जातात. भाषेसंदर्भातील हीच गुंतागुंत ओळखून मध्य प्रदेशातील इंदूर येथील एका तरुणानं अनोखं ॲप विकसित केलं आहे. अनुज सिंह असे या तरुणाचं नाव आहे. एक,दोन किंवा 10, 20 नव्हे तर काही सेकंदातच 200 हून अधिक भाषांचे भाषांतर करणारे ॲप अनुज सिंह यांनी बनवलं आहे. अनुज आणि त्यांच्या टीमने विकसित केलेल्या 'ट्रुलिंको ट्रान्सलेटर ॲप'ने (Trulinco translator App) हाँगकाँगमध्ये नुकत्याच झालेल्या आयटी फेअरमध्येही खूप प्रशंसा करण्यात आली. 

अनुज सिंह यांनी विकसित केलेल्या 'ट्रुलिंको ट्रान्सलेटर ॲपचे खास वैशिष्ट्य म्हणजे यातील दोन फीचर्स आहेत. भाषांतरासह यात व्हिडीओ कॉलिंगचेही फीचर आहे.

Trulinco translator App कसं काम करते ?

Trulinco translator App अत्यंत सोप्पं आहे. तुम्ही सहज वापरू शकतात. उदाहरणार्थ, तुम्ही रशियात आहात आणि तुम्हाला रशियन समजत नाही. मग तुम्हाला कुणाशी बोलायचं असेल तर ॲपमधलं रेकॉर्ड बटण दाबा आणि तुमच्या भाषेत रेकॉर्ड करा. काही सेकंदात हे ॲप तुमचं बोलणं रशियनमध्ये भाषांतरित करेल. त्यानंतर तुम्ही फक्त प्ले बटण दाबून समोरच्या व्यक्तीला ऐकवू शकतात. त्याचबरोबर समोरची व्यक्तीही तुमच्याशी रशियन भाषेत बोलेल, पण त्याचे संभाषण तुम्हाला तुमच्या भाषेत ऐकू येईल.मग ती हिंदी, इंग्रजी, मराठी, गुजराती किंवा इतर कोणतीही भाषा असो.

बिझनेससाठी अत्यंत उपयोगी ॲप

तुम्ही एखाद्या मल्टी नॅशनल कंपनीत काम करत असाल किंवा तुमचा स्वतः चा बिझनेस असेल तर या ॲपच्या मदतीने तुम्ही तुमचा प्रस्ताव किंवा कम्युनिकेशन 200 हून अधिक भाषांमध्ये भाषांतरित करू शकतात. उदाहरणार्थ, तुम्ही महाराष्ट्र, मध्य प्रदेश किंवा गुजरात त्याचबरोबर कोणत्याही प्रांतातले असाल तर तुमचा प्रस्ताव तुमच्या भाषेत लिहा आणि त्या संपूर्ण दस्तऐवजाचे इच्छित भाषेत रूपांतर करता येईल. त्यामुळे बिझनेससाठी हे ॲप अत्यंत उपयोगी ठरू शकते.

फोटोत काय आहे हेही सांगते ॲप

Trulinco translator App चे तिसरं मोठं वैशिष्ट्य म्हणजे तुम्ही कोणताही फोटो या माध्यमातून पूर्णपणे डिकोड करू शकतात. उदाहरणार्थ, त्या फोटोमध्ये काय आहे, तुमच्यासाठी काय आवश्यक आहे,हे तुम्हाला काही सेकंदात समजू शकते. अनुज सिंह यांनी सांगितले, की Trulinco translator हे केवळ भाषांतर ॲप नाही तर अनेक अर्थांनी आजच्या युगात प्रत्येकाला आवश्यक आहे. Trulinco translator App तुम्ही गुगल प्ले स्टोअर (Google Play Store) आणि ॲपल स्टोअर (Apple Store) वरूनही डाऊनलोड करू शकतात.