सांगली समाचार - दि. १० मार्च २०२४
भावनगर - गुजरातच्या भावनगर येथील रहिवासी गणेश बरैया हा सध्या आपल्या उंची आणि पदवीमुळे चर्चेत आहे. एमबीबीएस पूर्ण केल्यानंतर गणेश सध्या भावनगरच्या सर टी जनरल हॉस्पिटलमध्ये इंटर्नशिप करत आहे. त्याने भावनगर येथील शासकीय वैद्यकीय महाविद्यालयातून एमबीबीएसची पदवी पूर्ण केली आहे. इथपर्यंतचा त्यांचा प्रवास सोपा नव्हता. एमबीबीएस प्रवेशाबाबत त्याला दीर्घ कायदेशीर लढा द्यावा लागला. त्याला प्रवेश कसा मिळाला ते जाणून घ्या.
गणेश बरैया याला सुरुवातीपासूनच डॉक्टर बनायचे होते आणि 2018 मध्ये त्याने वैद्यकीय प्रवेश परीक्षा उत्तीर्ण केली. त्याची उंची केवळ तीन फूट आहे, त्यामुळे मेडिकल कौन्सिल ऑफ इंडियाने त्याला एमबीबीएसमध्ये प्रवेश देण्यास नकार दिला होता. एमसीआयने त्याची उंची खूपच कमी असल्याचे सांगून प्रवेश नाकारला होता आणि तो आपत्कालीन परिस्थिती हाताळण्यास सक्षम नाही, असेही सांगितले होते.
एमसीआयच्या या निर्णयाविरोधात गणेशने गुजरात हायकोर्टात जाऊन याचिका दाखल केली होती, पण तो खटला हरला. डॉक्टर होण्याचे त्याचे स्वप्न हळूहळू मावळू लागले होते, पण गणेशने हार मानली नाही. उच्च न्यायालयाच्या निर्णयाला त्याने सर्वोच्च न्यायालयात आव्हान दिले. ऑक्टोबर 2018 मध्ये सर्वोच्च न्यायालयाने गणेशच्या बाजूने निर्णय दिला आणि सांगितले की त्याची उंची कमी असूनही तो वैद्यकीय शिक्षण घेऊ शकतो आणि प्रवेश घेऊ शकतो.
सर्वोच्च न्यायालयाच्या निर्णयानंतर, 1 ऑगस्ट 2019 रोजी त्याला शासकीय वैद्यकीय महाविद्यालय, भावनगरमध्ये एमबीबीएससाठी प्रवेश मिळाला आणि अशा प्रकारे, अनेक अडचणींनंतर त्याचा वैद्यकीय अभ्यास सुरू झाला. 23 वर्षीय गणेश बरैयाने आता एमबीबीएसची पदवी पूर्ण केली असून तो सध्या इंटर्नशिप करत आहे. मीडिया रिपोर्ट्सनुसार, तो NEET PG परीक्षा देईल आणि वैद्यकीय क्षेत्रात पुढील शिक्षण घेईल.
