QR कोड म्हणजे नेमकं काय? तो कसा काम करतो? जाणून घ्या सविस्तर

सांगली समाचार  - दि. २५|०२|२०२४

सध्याच्या युगात जवळपास सर्वजण मोबाईल वापरतात. तसेच बहुतांशी लोक ऑनलाइन पेमेंट करण्यास पसंती देतात. हे पेमंट करताना तुम्ही QR कोड स्कॅन करता त्यावेळी समोरच्या व्यक्तीच्या बँकेची माहिती आपल्याला मिळते. त्यानंतर आपण रक्कम आणि पासवर्ड टाकतो व पेमेंट होते. मात्र QR कोड म्हणजे काय आणि तो कसा काम करतो हे अनेकांना माहिती नसेल, याबाबत आपण सविस्तर माहिती जाणून घेणार आहोत. 

QR कोड म्हणजे काय ?

QR कोडचा फुल फॉर्म क्विक रिस्पॉन्स कोड असा आहे. हा कोड खूप जलद कार्य करतो. हा कोड एका चौकोनी बॉक्समध्ये असतो. या बॉक्समध्ये URL आणि मोबाइल नंबर लपवलेला असतो. त्यामुळे तुम्ही जेव्हा स्कॅन करता, त्यावेळी ज्या व्यक्तीला पेमेंट करायचे आहे त्याचा तपशील तुम्हाला मिळतो.

QR कोड कुठे वापरला जातो ?

एखाद्याला पेमेंट करायचे असल्यास आपण QR कोडचा वापर करतो. पेमेंट व्यतिरिक्त अनेक उत्पादनांवर एक QR कोड असतो. ते स्कॅन करून तुम्ही उत्पादनाची माहिती मिळवू शकता. तसेच एखाद्या परीक्षेचा फॉर्म भरण्यासाठीही QR कोड वापरला जातो.

QR कोड कसा तयार करायचा ?

इंटरनेटवर तुम्हाला QR कोड तयार करणाऱ्या अनेक वेबसाइट मिळतील. यातील एका वेबसाईटला भेट द्या. त्यानंतर जर तुम्हाला तुमच्या बॅंक अकाउंटचा QR कोड तयार करायचा असेल तर, बॅंकेची माहिती भरा, सबमिट केल्यानंतर QR कोड तयार होईल. याची प्रिंट काढून तुम्ही त्याचा वापर करू शकता.

बॅंकेशिवाय तुम्ही तुमच्या वेबसाईटचाही QR कोड तयार करू शकता. यासाठी तुम्हाला वेबसाईटची URL कोडमध्ये लपवावी लागेल, हे कामही तुम्ही ऑनलाईन पद्धतीने करू शकता. 

दरम्यान, QR कोडद्वारे पेमेंट करताना तुम्ही काळजी घेणे गरजेचे आहे. QR कोड स्कॅन केल्यानंतर मिळालेली माहिती योग्य आहे का याची खात्री करा आणि त्यानंतर पेमेंट करा. मात्र काही वेळा बँकेचे सर्व्हर डाऊन असल्यास QR कोडने पेमेट करताना अडचणींचा सामना करावा लागतो.